"Jangan Marista"
Cipt. K Babay
Bilungka buah bilungka
Buah katapi kuning kulitnya
Marista jangan marista
Patahlah hati sudah takdirnya
Basuluh mangganggam suluh
Kadapnya malam manjadi tarang
Basimpuh duduk basimpuh
Hati nang dandam balalu tanang
Mun ruas batamu buku
Sudahlah ciri si rapun paring
Batulis adanya judu
Kawa manjadi duduk basanding
Parmata batu parmata
Intan campaka di Martapura
Bacinta hukum bacinta
Ada marista jua bahagia
Mambari Maras
Cipt. K Babay
Kayu hangit kada baapi
Kapal karam kada babanyu
Damintu sudah nasibnya diri
Buka bilangan kada bajudu
Banyu di nginum barasa duri
Nasi dimakan barasa rukam
Duduk malamun marista diri
Kada batantu siang wan malam
Dipisah baras lawanlah antah
Halu nya patah lasungnya hilang
Mambari maras hati nang patah
Kada mangana pikiran pusang
Lamun kada angin batiup
Mana lah pohon kawa baguyang
Sudah hukumnya didalam hidup
Susah wan sanang baganti datang
Itik Surati
Cipt. Babaya Bungas
Itik surati turun bakunyung
Mancari makan dibanyu landas
Dimapa diri kada tacungkung
Mangganangakan ading nang bungas
Itik surati turun ka padang
Turun dilapas mancucur sapat
Dimapa diri kada mangganang
Sudah pang lawas kada badapat
Itik surati mamakan banih
Banih dibatang buahnya hampa
Dimapa diri cakada sadih
Si ading datang mamagat cinta
Itik surati dirapun bangkal
Makan birudu dihiga kumpai
Dimapa diri cakada sangkal
Lamun pang judu cakada sampai
Tacungkung
Cipt. Babaya Bungas
Abahnya Wahid maharit banta
Maharit banta dipahalatan
Hatiku sakit lantaran cinta
Asa tarista mangganangakan
Abahnya Rifki tulak ka pasar
Tulak ka pasar mambawa bawang
Sakitnya hati ditinggal pacar
Ditinggal pacar ka lain urang
Abahnya Itro ka Padang Batung
Ka Padang Batung ka sakulahan
Sakit hatiku duduk tacungkung
Duduk tacungkung marista badan
Abahnya Kiki lagi manyervis
Baobeng kambang ditangan kiwa
Marinyut hati maarit tangis
Kada tasandang titikan jua
Abahnya Alfi tulak bagawi
Tulak bagawi ka kantor camat
Banyumataku titik ka pipi
Mangganang nasib cinta nang pagat
Abahnya Oga tulak balabuh
Tulak balabuh ka Samarinda
Banyumataku cakada taduh
Tabawa hati luka marista
Sahibar Parkir
Cipt. K Babay
Ui..
Jadi urang jangan pamalar
Harta dunia sahibar parkir
Sahibar parkir
Ui..
Pabanyak amal ka urang fakir
Babalasannya pasti mangalir
Pasti mangalir
Lawan kuwitan harus babakti
Janganlah sampai manyakit hati
Mun tasalah lakas baiki
Ui..
Jadi urang jangan pamalar
Harta dunia sahibar parkir
Sahibar parkir..
Hidup didunia sudah bawatas
Jadi baingat lawan nang diatas
Jadi baingat lawan nang diatas
Amal ibadah dibayar impas
Dosa wan karma pasti kan babalas
Dosa wan karma pasti kan babalas
Baapik-apik baingat-ingat
Supaya hidup kawa salamat
Dimuliakan dunia akhirat
Ui..
Jadi urang jangan pamalar
Harta dunia sahibar parkir
Sahibar parkir
Janjinya Diri
Cipt. K Babay
Kadada tabayang dalam khayalan Kita bakal tapisah nang salawasan Kadada jua firasat didalam hati Janjinya diri nang kaya ini
Ikam batulak mahadap Tuhan
Wan anak kita nang masih dalam kandungan
Kadada tabayang dalam khayalan..
Hanyar-hanyarnya kita bakakasihan Mambagi suka duka barumah tangga
Kada disangka maut mamisahakan Tatinggal diri sunyi bahati hampa Rela kucoba marelaakan
Ikhlas kucoba maikhlasakan Mudahan diri dikuatakan
Tarima takdir suratan badan
Kadada tabayang dalam khayalan..
Pantun Cinta Bahasa Banjar
Cipt. Babaya Bungas
Lamun palangi baubah warna
Pasti dunia umpat binasa
Lamun pang hati kadada cinta
Apalah rasa salain hampa
Tabang sarapun batang rumbia
Ambil daunnya diulah hatap
Bahitung tahun mamandam cinta
Pabila jua kawa taucap
Burung nuri dikayu jati
Umpat bahinggap burung merpati
Nang aku cari cinta sejati
Kawan dihidup sampai ka mati
Putik kuini matan tangkainya
Buat ka wadah param diatang
Sampai wahini kada pang lupa
Ikam nang sudah diambil urang
Ambil tampurung banam di api
Banyak baranya mamasak lamang
Kada bauntung nasibnya diri
Bapadah cinta ditampik urang
Pisang awa rasanya kalat
Param sasikat dalam karanjang
Lamun cinta talanjur pagat
Bawa bagamat mancari pulang
Cari parmata ka Martapura
Tarus Sampit sampainya sanja
Lamun cinta sudah mambara
Dalas hangit kulapas kada
Ka Parigi mandulang amas
Singgah satumat manukar rimpi
Patah hati jangan balawas
Bawa bagamat mancari pulang
Rawa-rawa tinggi sabatang
Rapun rambai patah sadahan
Jaka kawa ikam ku pinang
Kita batatai dipalaminan
Putik sukun matan tangkainya
Kupas hampalam dibalah dua
Kada kuhakun malabuh cinta
Lamun pang karam dibanyumata
Jangan ditabang si rapun manggis
Mun nang cundung si rapun rambai
Dimapa kumbang kada manangis
Malihat kambang layu ditangkai
Tumis kastila lawanlah kangkung
Sanga iwaknya si iwak wadi
Nang kaya apa kada tacungkung
Urang dicinta sudah balaki
Tulak malunta dihujan rintik
Mandapat iwak saluang mudik
Banyumata gugur manitik
Diri tahadang janji sabatik
Buah kuranji buah mingkudu
Daun kaladi bacabang dua
Ikam bajanji samanis madu
Tapi nang jadi racun babisa
Tatak batang dapa sambilan
Dibalah-balah sama ratanya
Asa himung basasayangan
Wayah tapisah liwar marista
Tabang pisang dipahumaan
Masak sasikat dimakan musang
Kada tabayang dalam khayalan
Hanyar badapat tapisah pulang
Tarabang halang ka atas bukit
Hinggap batiti dirapun rambai
Sudahlah pusang batambah sakit
Sakitlah hati badan tacarai
Burung pipit mamakan banih
Banih disawah masaknya rata
Bujur sakit bacarai kasih
Makan bakuah si banyumata
