Pantun Papadahan

Pantun Papadahan
Cipt. Babaya Bungas

Rapun tiwadak dipahalatan
Rapunlah gambir rabah ka jalan
Lamun pang handak banyak bakawan
Dijaga pandir wan kalakuan

Rapun tiwadak tumbuh digunung
Patah sadahan ulah titian
Lamun pang handak hidup bauntung
Nang paasian lawan kawitan

Rapun tiwadak batangnya tinggi
Tinggi pang lagi rapun kasturi
Lamun pang handak banyak rajaki
Nang dicangkali saing bacari

Rapun tiwadak tabang wan parang
Mambanam ratik timbun di api
Lamun pang handak disayang urang
Baapik-apik mambawa diri

Rapun tiwadak di hulu tabat
Ulah galagar dapa sambilan
Lamun pang hidup babarkat
Nang bujur banar ulah amalan